ഞാൻ സുന്ദരി ആയതുകൊണ്ട് ആ സിനിമയ്ക്ക് യോജിക്കില്ലെന്ന് സംവിധായകൻ പറഞ്ഞു; നീന ഗുപ്ത

1994-ൽ ശേഖർ സംവിധാനത്തിൽ പുറത്തിറത്തിറങ്ങിയ ചിത്രമാണ് 'ബാൻഡിറ്റ് ക്വീൻ'. ഫൂലൻ ദേവിയെക്കുറിച്ചുള്ള കഥകളായിരുന്നു സിനിമ പറഞ്ഞിരുന്നത്. സീമാ ബിശ്വാസ് ആണ് സിനിമയിൽ നായികയായി എത്തിയത്. ഇപ്പോഴിതാ സിനിമയിൽ ഈ വേഷത്തിനായി ഓഡിഷൻ നടത്തിയിരുന്നുവെന്നും എന്നാൽ താൻ സുന്ദരി ആയതുകൊണ്ട് ആ വേഷത്തിലേക്ക് പരിഗണിച്ചില്ലെന്നും പറയുകയാണ് നടി നീന ഗുപ്ത.

'ബാൻഡിറ്റ് ക്വീൻ സിനിമയുടെ കാസ്റ്റിങ് നടക്കുന്ന സമയം. ഫൂലൻ ദേവി എന്ന പ്രധാന കഥാപാത്രം വളരെ സങ്കീർണതകൾ നിറഞ്ഞതാണ്. ആ വേഷത്തിന് വേണ്ടി ഓഡിഷൻ നടത്താൻ സംവിധായകൻ തീരുമാനിച്ചു. ഞാനും ആ ഓഡിഷനിൽ പങ്കെടുത്തിരുന്നു. ഓഡിഷനായി സംവിധായകന് എന്റെ ഫോട്ടോ അയച്ചുകൊടുത്തത് ഇപ്പോഴും ഓർമയുണ്ട്.

കഥാപാത്രത്തിന് ആവശ്യമായ രീതിയിലുള്ള ചിത്രങ്ങളായിരുന്നു അത്. പക്ഷേ ഞാൻ ആ കഥാപാത്രത്തിന് അനുയോജ്യയല്ലെന്ന് അദ്ദേഹത്തിന് തോന്നി. നിങ്ങൾ ഒരുപാട് സുന്ദരിയായതുകൊണ്ട്, ഈ കഥാപാത്രത്തിന് യോജിക്കില്ലെന്നാണ് അദ്ദേഹം പറഞ്ഞത്. അവർക്ക് കുറച്ച് ഇരുണ്ടനിറത്തിലുള്ള ആളെയായിരുന്നു വേണ്ടിയിരുന്നത്. സീമാ ബിശ്വാസ് നന്നായി അഭിനയിച്ചിട്ടുണ്ട് ചിത്രത്തിൽ,' നീന ഗുപ്ത പറഞ്ഞു.

കാൻ ഉൾപ്പെടെയുള്ള നിരവധി ഫെസ്റ്റിവലുകളിൽ പ്രദർശിപ്പിച്ച ചിത്രമാണ് 'ബാൻഡിറ്റ് ക്വീൻ'. സിനിമയ്ക്ക് എതിരെ ഫൂലൻ ദേവി തന്നെ രംഗത്ത് എത്തിയിരുന്നു. എന്നാൽ ആ വർഷത്തെ ദേശീയപുരസ്‌കാരങ്ങളിൽ മൂന്നെണ്ണം 'ബാൻഡിറ്റ് ക്വീൻ' നേടി. മികച്ച ഹിന്ദിസിനിമ, മികച്ച നടി, മികച്ച കോസ്റ്റിയൂം ഡിസൈനർ എന്നീ പുരസ്‌കാരങ്ങളാണ് സിനിമ സ്വന്തമാക്കിയത്. അതേസമയം, വലിയ ഇടവേളയ്ക്ക് ശേഷം വീണ്ടും സിനിമയിൽ സജീവമാക്കാൻ ഒരുങ്ങുകയാണ് നീന ഗുപ്ത. 'വധ് 2' ആണ് ഇനി അവരുടേതായി ഇറങ്ങാനിരിക്കുന്ന ചിത്രം.

Content Highlights:  Neena Gupta spoke about missing out on a role in Bandit Queen. She said the director felt she was too beautiful for the character.

ഞാൻ സുന്ദരി ആയതുകൊണ്ട് ആ സിനിമയ്ക്ക് യോജിക്കില്ലെന്ന് സംവിധായകൻ പറഞ്ഞു; നീന ഗുപ്ത